Häagen-Dazs™╳Pierre Hermé雪糕 馬卡龍雪糕系列

Häagen-Dazs™與法國殿堂級甜點大師Pierre Hermé首度聯乘，將早前喺英、法率先推出嘅「馬卡龍雪糕系列」帶嚟香港。黛安知道，呢個系列有3種口味，包括雙重朱古力馬卡龍口味雪糕杯、柚子檸檬馬卡龍口味雪糕杯，及士多啤梨紅桑子馬卡龍口味雪糕杯和脆皮雪糕批。

其中濃郁嘅朱古力雪糕加入黑朱古力軟心醬，結合有杏仁香嘅馬卡龍脆餅，令人一試難忘；而混合咗紅桑子軟心醬嘅士多啤梨雪糕，每啖都食到果香四溢；至於脆皮雪糕批則裹上薄脆外層嘅紅桑子脆皮，由內到外都咁滋味；黛安最鍾意嗰款係清新柚子檸檬雪糕加入柚子檸檬軟心醬，配搭馬卡龍脆餅，酸酸甜甜好美味。

Häagen-Dazs™更喺專門店推出多款同口味嘅雪糕凍飲，仲揀咗士多啤梨紅桑子馬卡龍口味推出雪糕蛋糕㖭，大家快啲去試下啦。